افتقدنى

شعور مؤلم حين تفتقد نفسك , فلا انت انت !! اشعر بالغربه مع نفسى لا افهمنى ولا اسمعنى ولم اعد ارانى
متخبطه تائهه , حياتى كلها اصبحت علامه استفهام كبيره ؟
اين انا ؟ اين اجدنى ؟ 
ولكنى موقنه تماما انه سياتى يوم اجد فيه نفسى , فكم اشتقت اليها

مش اى حد يخبط على قلبك تفتحه الباب
لان فى عيال بتخبط وتجرى

أحساس

اليوم فقط اكتشفت سذاجتى ؟ اليوم فقط !!!
اليوم اعرف انه كاذب , مخادع , خائن 
اااااه ياحب كم من جرائم ترتكب باسمك
كم من طعون وآلام نتلقاها باسم الحب 

مدونتى العزيزه سأتركك الليله ولكن على وعد منى ايتها الغاليه لن اهجرك مره اخرى ان شاء الله

انا نفسى احب بجد بأه , زهقت من الاحساس الوحش ده ان ممكن يكون فى حد بيحبك بس انت مش قادر تحبه ولا قادر تمثل عليه الحب
من باب انه فرصه ومضيعهاش من ايدى 
يارب ارزقنى زوج زى القمر وحلو وابن ناس وعنده فلوس وصغير فى السن ويموت فيا هو واهله 
واحبه يارب واتجوزه :D

مفيش حاجه بعيده ولا كبيره عليك يارب ظنى فيك خير  , ولو ان الرجاله اتعمت بس مش مشكله هو هيجى يعنى هيجى وهيجى لوحده من غير اى ضغوط

تعالا بأه علشان متعصبش عليك مش لازم ازعق يعنى واعلى صوتى واقولك تعالا بأه يالى فى بالى انا عايزه اتجوز بأه واخلف عيال

مجانيين كده واشقيه يقلبوا البيت كله ويطيروا من عنيك النوم , يابنى تعالا صدقنى مش هتلاقى زيى دانا هخلى حياتك كلها مفاجأت 

اصل انت كده كده جى فاستعجل احسنلك :)

حب من طرف واحد

كانت تنتظره كعادتها فى شرفه المنزل والذى يبعد عن منزله بمسافه خطوات صغيره , تنتظر ان تراه وهى تلتصق بالحائط حتى لا يراها , وتكتفى بنظره من بعيد تروى شوقها وعطشها لرؤيته .
هذا الحبيب الذى لا تعلم عنه شىء سوى ملامح وجهه وملابسه الميرى , دائما تتسائل اى شىء جذبنى اليك ؟ جعلنى احبك اعشقك اتنفسك احلم بك انتظرك ساعات وساعات لا تتحرك عينى عن هذا الطريق , ربما تأتى ولا استطيع رؤيتك !!!
كانت نظره واحده له تكفيها , ظلت سنوات عديده ترفض كل من يتقدم يطلب قربها , كل من يدق الباب ترفضه قبل ان تراه , متعلقه ومنتظره وهم هذا الحبيب الذى لا يعرف عنها اى شىء , كل خميس هى زيارته للاهل يأتى بعد اسبوع عمل بالتاكيد هو يعمل خارج المدينه !!
ظلت تتذكر حبها واول مره قلبها يدق لهذا الحبيب من عده سنوات وهذا الشعور الغريب الذى بنتابها عندما تراه ودقات قلبها المتسارعه
حتى رأت سيارته , فرحت كاد ان يرقص قلبها ويقفز من شده السعاده ولكن لم تدم هذه السعاده كثيرا راته وكذلك من كانت معه يدها بيده متمسك بها يضحك يفتح لها باب السياره
لم تستطع ان تتنفس او حتى تتحرك وكان اصابها شلل مميت , وانا ؟ وحبى لك ؟ وانتظارى ؟
تركت الشرفه اخيرا والدموع تتحجر فى عينيها تريد البكاء وكأن عينيها ابت أن تدمع عقابا لها على هذا الحبيب الذى طالما نظرت اليه ولم ينظر لها يوم ما , وكيف ينظر لها او حتى يعرفها وهى دائما خلف هذه الشرفه تلتصق بهذا الحائط تخشى ان يراها وتواجهها نظراته !! شعور بالضياع الحزن والقهر 
بعد اسبوع كانت تقف فى شرفتها تنتظر هذا الشاب الذى يسكن امامها والذى يعمل فى العاصمه مهندسا ويأتى لزياره والدته كل اسبوعين ولكن هذه المره لم تكن تلتصق بالحائط بل كانت تقف بكل جرئه ولاول مره تنتظر ان تأتى عينه بعينها لعله يعوضها هذا الوهم الضائع

حديث المرآه

حديث المرآه

قالت لى :

فى حاجات غريبه كتير بتحصلى مش بفهمها ولا حتى بعرف اعبر عنها , يعنى مثلا لما بكون لوحدى بتكلم مع نفسى كتير وبقدر اعبر عن كل اللى جوايا , عكس لما بكون مع الناس بحس انى مخنوقه مش قادره اتأقلم معاهم ولا عارفه أعبر عن اللى جوايا

بخاف اتعود الوحده , رغم انى فعلا اتعودها , وبفكر كتير ليه بخاف من الوحده ؟

رغم انى بستريح فيها وبحس بنفسى بجد وانا لوحدى !!!

يمكن لان كل الناس اللى بتعامل معاهم دايما بيتكلموا معايا فى موضوع واحد وهو " الجواز " دخله على 26سنه ولسه حتى ماتخطبتش !!!

أنا مش قادره افهم ايه التدخل ده وليه الاستغراب رغم ان فى اكبر منى لسه متجوزوش ؟ على العموم الموضوع مش بيشغل بالى لكن اللى بيدايقنى كلام الناس

صمتت لبرهه من الوقت ثم نظرت لى وحدقت فى وكأنها تقول كاذبه , وأكملت حديثها

انا فعلا نفسى اتجوز , بس مش اى حد نفسى اتجوز اللى بحبه , لكن اللى بحبه وبيحبنى متجوز وعنده اولاد وزوجه , انا مش عايزاه يبعد

عن اولاده وبردو مش عايزاه يبعد عنى , نفسى اكون معاه قدام الناس كلها مش مستخبيه , نفسى كل الناس تعرف اننا بنحب بعض ونتقابل ونتكلم واحنا مش خايفيين , بتمنى من ربنا سبحانه وتعالى ياخد القرار وانا مستعده اتحدى العالم كله علشانه ومعاه

تنهدت ... ونظرت طويلا الى نفسها ثم ابتسمت واخذت تهندم ملابسها وحجابها وودعتنى قائله :

أنا لازم اخرج دلوقتى علشان ألحق معادى معاه ولما ارجع هحكيلك على كل حاجه

حديثها ذادنى حيره مثلما يحدث كل مره ! أتحدثنى أم تحدث نفسها فى ؟ ولكن ما الفرق فأنا وهى بالفعل واحد